3-17 ноябрь кунлари БААда бўлиб ўтадиган ёшлар ўртасидаги Осиё чемпионатига тайёргарлик кўраётган Ўзбекистон U19 терма жамоаси Эрон ёшларидан мағлуб бўлди – 1:3.

Осиё чемпионатининг финал босқичига йўл олган мазкур икки мамлакат ёшлари саралаш босқичида ҳам ўзаро кураш олиб боришганди. Теҳронда бўлиб ўтган саралашнинг сўнгги турида форслар Аҳмаджон Мусаев шогирдларини 2:0 ҳисобида мағлуб этишган. Шу тариқа Эрон қитъа чемпионатига биринчи, Ўзбекистон эса иккинчи ўрин билан йўл олган.

«Пахтакор» стадионида ташкил этилган ўртоқлик ўйинини мезбонлар фаол бошлаганларига қарамай, ҳисоб 22-дақиқада мезбонлар томонидан очилди. 58-дақиқада Игорь Сергеев мувозанатни тиклашга муваффақ бўлганди. Бироқ якунда ўзбекистонликлар ғалабани ушлаб қола олишмади. Сергеевнинг голидан икки дақиқа ҳам ўтмай форслар яна олдинга чиқиб олган бўлишса, 86-дақиқада улар пенальтини аниқ амалга ошириб, ўйинга мантиқий якун ясашди. Қайд этиш керак, бунга қадар Абдул-Азиз Юсупов 84-дақиқада пенальтидан аниқ фойдалана олмаганди.

Ўзбекистон U19 Эрон ёшларига қарши иккинчи ўртоқлик учрашувини 15 август куни Самарқанддаги «Динамо» стадионида ўтказади. Сентябрдаги йиғин доирасида Мусаев шогирдлари Вьетнамдаги турнирда иштирок этишади. 

Ўзбекистон: Акмал Турсунбоев, Азамат Шарипов, Бобур Йўлдошев, Жавлон Мирабдуллаев, Владимир Козак, Тохир Шамсутдинов,Сардор Раҳмонов, Аббос Махситалиев, Жамшид Искандеров, Игорь Сергеев, Жалолиддин Машарипов.

Захира футболчилари: Асилбек Омонов, Муҳсин Убайдуллаев, Жасур Толипов, Жалолиддин Саидов, Сергей Рекун, Искандар Шойқулов, Жасур Ҳакимов, Абдул-Азиз Юсупов, Абдуллоҳ Олимов.