11 август куни Ўзбекистон миллий терма жамоаси Иордания пойтахти Амман шаҳрига йўл олди.

13 август куни Иордания миллий терма жамоасига қарши дастлабки ўртоқлик ўйини ташкил этилса, орадан икки кун ўтиб – 15 августда ФИФАнинг халқаро ўртоқлик учрашувлари кунидан унумли фойдаланиб, иккинчи беллашув ўтказилади.

Ўзбекистон миллий терма жамоасининг кенгайтирилган таркиби мазкур ҳаволада тақдим этилган. Миржалол Қосимов Амманга заҳира футболчилари хизматидан фойдаланмай йўл олди. Асосий таркибга жалб қилинган футболчилардан Одил Аҳмедов жароҳати сабаб Амманга бора олмайди. Сервер Жепаров ва Санжар Турсунов каби футболчилар Иорданиянинг ўзида делегация таркибига келиб қўшилишади.

Ўзбекистон миллий терма жамоасининг Амманга йўл оладиган кунидан 33 йил олдин шонли «пахтакорчилар» Украина осмонидаги ҳалокат сабаб бу дунёни тарк этишганди. Ўз навбатида Ўзбекистон миллий терма жамоаси аъзолари сафар олдидан «Пахтакор-79»ни хотирлаб, «Боткина»да ўрнатилган ёдгорлик сари йўл олишди. Марҳумларни хотирлаб, улар учун атаб ўрнатилган ёдгорлик пойига гуллар қўйишди.