Ўзбекистон миллий терма жамоасига даъвогар футболчилардан бири – Максим Шацких тўп сураётган Киевнинг «Арсенал» клуби Европа лигасининг учинчи саралаш босқичини ғалаба билан бошлади.

Украина Премьер-лигасининг 2011/2012 йилги мавсум якунларига кўра 5-ўринни эгаллаган «тўпчилар» халқаро майдондаги иштирокларини айнан учинчи босқичдан бошлашлари керак эди. Бу йўлда Словениянинг «Мура-05» клубини Киевда қабул қилган «Арсенал» 3:0 ҳисобида муваффақият қозонди. Биринчи бўлимнинг 6-дақиқасидаёқ ҳисобни очган мезбонлар, иккинчи бўлимда яна икки бор муваффақият қозонишди. Ўзбекистонлик Максим Шацких учрашувда тўлиқ – 90 дақиқа ҳаракат қилди.

Мазкур йирик ғалабадан кейин «Арсенал» Евролиганинг плей-офф босқичига йўл олиш учун яхши имконият ҳосил қилди. Словениядаги жавоб ўйини 9 август куни бўлиб ўтади.

Қайд этиш керак, ўтган мавсумни 5-ўринда якунлаган «Арсенал» жорий йил стартида қийинчиликка дуч келди. Украинанинг доимий икки лидери - «Шахтёр» ва «Динамо» дастлабки икки турдаёқ «Арсенал»га тўқнаш келиб, «тўпчилар»ни мағлуб этишди. Фақатгина 3-турда Максим Шацких жамоадошлари сафарда «Заря»ни таслим қилиб, мавсумдаги илк расмий ғалабани қўлга киритишди. Шацких мазкур беллашувда дубл қайд этиб, «Арсенал»нинг янги мавсумдаги голлар сериясини бошлаб берганди.