Осиё Кубоги 2011 мусобақаларининг эртага бўлиб ўтадиган Ўзбекистон - Австралия ярим финал учрашувидан олдин, Доҳадаги Бош Медиа марказда Ўзбекистон миллий терма жамоаси бош мураббийи Вадим Абрамов ҳамда жамоа етакчиларидан бири бўлган Одил Аҳмедов иштирокларида матуот анжумани бўлиб ўтди.
Рақиб тўғрисида сўз очаркан, жамоамиз бош мураббийи Австралия жуда кучли ва яхши футболчилардан иборат терма жамоа эканлигини, лекин бу жамоага қарши ўйнаш мумкин эканлиги таъкидлаб ўтди.
“Эртага иккала терма жамоани ҳам қийин учрашув кутмоқда. Австралия ҳам худди биз каби финал иштирокчисига айланмоқчи. Ўйлайманки, учрашувни тамоша қиладиган муҳлислар ундан завқ олишади. Австралия тўғрисида гапирадиган бўлсам, бу ярим финалга чиққан барча жамоалар каби жуда кучли терма жамоадир. Аммо биз Австралияни мағлуб этишга ва финалга чиқиб Кубок соҳибига айланишга интиламиз. Австралияни ютса бўлади, аҳир олдимизда Бразилия терма жамоаси тургани йўқку. Нега масалан, Япония терма жамоаси ўртоқлик учрашувда Аргентина устидан ғалаба қозонадию, Ўзбекистон эса, Австралияни мағлуб эта олмайди? Бу футбол, ва футболда исталган жамоа зафарга эришиши мумкин. Шунинг учун ҳам учрашувдан олдин жамоалар имкониятини 50-50 деб баҳолайман”.
Ўзбекистоннинг энг иқтидорли футболчиларидан бири бўлган Одил Аҳмедов эса, Австралия терма жамоаси тўғрисида қуйидаги фикрни билдириб ўтди: «Биз рақиб ўйин услубини синчковлик билан кузатиб чиқдик. Австралия терма жамоасининг ҳам заиф нуқталари бор. Масалан, Ироқ билан бўлган учрашувда Австралия дарвозасида олдида ироқлик футболчилар бир неча бор хавфли вазиятлар яратишди. Аммо улар яратилган вазиятлардан фойдалана олишмади. Биз ўз имкониятларимиздан фойдалансак, Австралия терма жамоасини ҳам мағлуб этамиз ва Кубок томон яна бир қадам ташлаймиз”.
