Халқаро футбол уюшмаси ФИФА дунё терма жамоаларининг янги рейтингини эълон қилди. Унга кўра сўнгги рейтинг эълон қилинган кундан ҳозирга қадар бирорта ҳам ўйинда иштирок этмаган Ўзбекистон миллий терма жамоаси икки поғона юқорилаб, 63-ўринга келиб жойлашди.

Маълумот ўрнида айтиш ўринлики, ФИФА рейтинг тузаётганда сўнгги тўрт йиллик натижаларидан ҳам кўз юммайди. Айнан шунга кўра Ўзбекистон икки поғона юқорига кўтарилишга муваффақ бўлган. Бу Осиё миқёсида бешинчи кўрсаткичдир. Ўзбекистондан олдинда Япония (22), Австралия (24), Жанубий Корея (29) ва Эрон (48) мамлакатлари бормоқда. Мазкур квартетдан фақатина Эрон иккита поғона юқорига кўтарилган бўлса, дастлабки уч мамлакатда шўнғиш кузатилган. Кунчиқар юрт терма жамоасида бу пасайиш 2тани, Австралия ва Жанубий Кореяда 1тани ташкил қилмоқда.

Ўзбекистон миллий терма жамоасининг ЖЧ-2014 йўлидаги рақибларидан Қатар ўзгаришларсиз 98-ўрнини сақлаб қолган бўлса, Ливан 17 поғона (!) юқорилаб, 127-ўринга келиб жойлашди. Бу каби катта сакраш шунингдек Туркманистонда ҳам кузатилган бўлиб, қўшни республиканинг бош жамоаси 14 поғонага ўз аҳволини яхшилаб, 124-ўринда бормоқда.

Ўзбекистондан кейинги ўринларни Осиё мамлакатларидан Хитой (69), Иордания (83), Ироқ (84), КХДР (91), Уммон (92) кабилар эгаллаб турибди.

Дунё рейтингини жаҳон ва Европа чемпиони Испания бошқариб турибди. Кучли учликка Германия ва Англия, ўнталикка эса шунингдек Уругвай, Португалия, Италия, Аргентина, Голландия, Хорватия ва Дания кира олган. Россия икки поғона юқорилаб 11-ўринга келиб жойлашган. Ўнталикка кириш учун Россия яна 1 очко жамғарса кифоя.

Эслатиб ўтамиз, Ўзбекистон миллий терма жамоасини олдинда Иорданияга қарши 2та ва Кувайт билан 1та ўртоқлик ўйини кутиб турибди. Иорданияга қарши ўйинлар 13 ва 15 август кунлари Амманда бўлиб ўтса, Кувайт 7 сентябрь куни Тошкентда меҳмон бўлади ва бу ўйин Жанубий Кореяга қарши ЖЧ-2014 саралаши олдидан тайёргарлик вазифасини ўтаб беради.