Ўзбекистон миллий терма жамоасига аъзо бир йўла уч нафар футболчи ҳаракат қилаётган Қозоғистоннинг «Актобе» клуби учинчи саралаш босқичининг дастлабки ўйинида имкониятни бой берди.

Бельгияда «Генк» меҳмони бўлган қўшни республика вакили 1:2 ҳисобида енгилишди. Беллашувнинг 18-дақиқасида мезбонлар пенальтидан муваффақият қозонишди. Орадан етти дақиқа ўтиб меҳмонлар мувозанатни тиклашганди. Бироқ 44-дақиқада Жозеф-Монроз томонидан киритилган гол ўйиндаги якунийси бўлди.

Иккинчи босқичнинг дастлабки ўйинини Молдовада «Милсами» клубига қарши ўтказган «Актобе» 2:4 ҳисобида енгилиб, жавоб ўйинида вазиятни ўз томонига оғдира олганди – 3:0. Бельгияда учралган 1:2 ҳисобидаги мағлубият иккинчи босқичдаги мағлубиятга нисбатан қониқарлидир.

Европа лигасида «Актобе»га катта ёрдам бераётган трио Бельгиядаги ўйинда ҳам асосий таркибда майдонга тушди. Тимур Кападзе тўлиқ – 90 дақиқа ҳаракат қилган бўлса, Александр Гейнрих 81, Марат Бикмаев 89-дақиқада ўз ўрнини бошқа бир футболчига бўшатиб берди. Бунга қадар «Актобе» иштирокидаги 4та халқаро ўйинни ўзбекистонлик футболчилар голсиз тарк этишмаганди (Бикмаев 2та, Кападзе ва Гейнрих 1тадан).

Қозоғистондаги жавоб ўйини 9 август куни бўлиб ўтади.