1991 йилда таваллуд топган футболчилардан иборат Ўзбекистон терма жамоаси 2013 йилнинг 17-27 январь кунлари Санк-Петербургда бўлиб ўтадиган «Ҳамдўстлик Кубоги-2013» мусобақасида иштирок этиши мумкин. Бу борада Россия футбол иттифоқи Ўзбекистон футбол федерациясига таклиф билан чиқди.

Йигирма биринчи бор ўтказиладиган турнир регламенти ўзгармаган ва унда 16та мамлакат терма жамоаси 4та гуруҳга бўлинган ҳолда чемпионлик учун кураш олиб боради. Қайд этиш керак, 1991 йилда туғилган футболчилардан ташкил топган Ўзбекистон U22 терма жамоаси 2014 йилнинг январь ойида Уммон мезбонлик қиладиган Осиё чемпионатида иштирок этади. Роппа-роса бир йил аввал ўтказиладиган турнир эса Алексей Евстафеев шогирдларига тайёргарлик вазифасини ўтаб бериши мумкин.

2012 йилда «Ҳамдўстлик Кубоги» турнири формати ўзгариб, унда ёшлар терма жамоаларининг иштирок этиши белгилаб қўйилганди. Унга қадар бўлиб ўтган 19та мусобақада эса МДҲ ва Болтиқбўйи мамлакатлари чемпионлари иштирок этишганди. 2007 йилги мавсумда Тошкентнинг «Пахтакор» клуби бош совринга эга чиққанини қайд этиш ўринли. Ҳал қилувчи ўйинда «пахткорчилар» Латвиянинг «Вентспилс» клубини пенальтилар сериясига кўра мағлуб этишган.

Орадан бир йил ўтиб Тошкент клуби яна финалга етиб келди ва Озарбойжон чемпиони «Хазар-Ленкоран»га имкониятни бой берди – 3:4. Шунингдек Фарғонанинг «Нефтчи» клуби ҳам 1994 йилги мавсумда финалга қадар етиб борган бўлиб, Москва «спартакчилар»идан 0:7 ҳисобида енгилган.

Бир йил аввал бўлиб ўтган янги форматдаги турнирда Ўзбекистон футбол федерацияси ўз терма жамоаси билан иштирок этишни истамаган.