Ўзбекистонлик ФИФА рефериси Владислав Цейтлин 22 августдан 2 сентябрга қадар Ҳиндистон пойтахти Нью-Деҳлида бўлиб ўтадиган «Nehru Cup-2012» турнирида ҳакамлик қилади. Цейтлиндан ташқари мазкур турнирда шунингдек Хусниддин Шодмонов ҳам иштирок этади.
Қайд этиш керак, мазкур мусобақа 1982 йилда илк марта ташкил этилиб, 1997 йилга қадар узлуксиз давом этган. Айнан сўнгги йилги финалга Ироқ ва Ўзбекистон терма жамоалари етиб келишган ва унда ироқлик футболчилар 3:1 ҳисобида муваффақият қозонишган. Шундан кейин 10 йил давомида турнир ўтказилмади ва 2007 йилга келибгина Ҳиндистон футбол федерацияси уни қайта тиклашга қарор қилди.
2009 йил бўлиб ўтган сўнгги турнир финалига қадар Ҳиндистон ва Сурия терма жамоалари етиб келишди. Беллашувда пенальтилар сериясига кўра ғалаба қозонган мезбонлар бош совринга эга чиқишди.
2012 йилги мусобақада Ҳиндистондан ташқари Сурия, Иордания, Афғонистон, Малдив ороллари, Кения ва Камерун терма жамоаларининг иштирок этиши кутилмоқда.
