Осиё футбол конфедерацияси 19 ёшгача бўлган футболчилар ўртасидаги қитъа чемпионати ўйинларини бошқарадиган ҳакамлар, назоратчилар, лайнсмен ва комиссарлар номини эълон қилди.

Қайд этиш керак, 19 ёшгача бўлган футболчилар ўртасидаги Осиё чемпионати шу йилнинг 3-17 ноябрь кунлари БААда бўлиб ўтади. ОФК қарорига кўра унда 4тадан комиссар ва назоратчи, 12та бош ва 16та қанот ҳакамлари иштирок этади. Бош ва қанот ҳакамларини тайинлашда ОФК ҳеч бир мамлакатга иккита ўрин ажратмаган. Ўзбекистон футбол федерациясига тақдим этилган мактубга кўра ёшлар ўртасидаги Осиё чемпионатида Равшан Эрматов ва Жаҳонгир Саидов Ўзбекистон номидан иштирок этишади.

Мактубда кўрсатилишича, 31 октябрь куни ҳакамларнинг барчаси БААга етиб келиб, 1 ноябрь куни фитнес тест топширади. 2 ноябрь куни эса тайёрлов курслари бўлиб ўтади.

Маълумот ўрнида қўшимча қилиш керакки, Осиё чемпионати U19да Ўзбекистон шарафини Ахмаджон Мусаев бошқарувидаги ёшлар терма жамоаси ҳимоя қилади.