ОАВ ҳодимлари ўртасида ўтказилган футбол турнири ўз якунига етди.

Ўзбек футболининг 100 йиллик юбилейи ва 27 июнь – ОАВ ҳодимлари куни муносабати билан ўлказилган мазкур турнирнинг сўнгги кунида дастлаб ЎзДЖТУ ва «Моварауннаҳр» жамоалари 3-ўрин йўлида кураш олиб боришди. Унда нисбатан фаолроқ кўринган жаҳон тиллари университети домлаларидан ташкил топган ЎзДЖТУ 4:2 ҳисобида зафар қучиб, турнирнинг бронза медалларига эга чиқди.

Кўпчиликнинг диққат марказида турган ЎФФ ва МТРК жамоалари ўртасидаги финал беллашуви анча қизиқарли руҳғда ўтиб, унда мусобақа мезбонлари – Ўзбекистон футбол федерацияси ҳодимларидан ташкил топган жамоа аъзолари 2:0 ҳисобида ғалаба қозонишди. МТРК вакилларининг ўйиндаги устунлиги ҳисобда акс этмади. Йўқса улар томонидан берилган зарбаларнинг нақд 6таси дарвоза тўсини ва устунига тегиб, майдонга қайтганди.

Турнир якунида Ўзбекистон футбол федерацияси фаҳрийлар кенгаши вакилларидан Наримон Жалолов, Тўлаган Исоқов, Вячеслав Солохо, Ахбор Имомхўжаев кабилар совриндор жамоаларни эсдалик медаллари, совғалар, дипломлар ва Кубок билан тақдирлашди.

Ўз навбатида Ўзбекистон футбол федерцияси матбуот хизмати эртага – оммавий ахборот воситалари куни муносабати билан шу соҳада ижод қилаётган барча журналистларни касб байрами билан муборакбод этиб, энг яхши тилакларни билдириб қолади. Байрамингиз муборак ҳамкасблар!